Гүний худаг

Газрын доорх ус буюу гүний ус нь Монгол орны хамгийн чухал усны эх үүсвэр билээ. Монгол орны нийт усны хоёр хүрэхгүй хувь нь гүний цэнгэг ус байдаг. Гүний ус нь хүний ​​үйл ажиллагаа, экосистемийг хадгалахад чухал үүрэг гүйцэтгэдэг.

Ус бол хүний амьдралын үнэт хэрэглээ, юугаар ч орлуулашгүй бүтээгдэхүүн билээ. Түүний үнэт чанар нь химийн аргаар гарган авч болдоггүй, хүн усгүйгээр амьдарч чадахгүйд байгаа юм. Дэлхий дээр байгаа бүх усны 1 хувь нь цэвэр ус байдаг. Харин 97 хувь нь далай тэнгисийн ус, 2 хувь нь хойд өмнөд туйлын ус билээ. Ундны цэвэр ус өнөөдөр маш том санаа зовоосон асуудлуудын нэг болоод байна.

Худаг гаргуулахад:

• Иргэн бол өргөдөл, аж ахуйн нэгж, байгууллага бол албан хүсэлт
• Аж ахуйн нэгж бол улсын бүртгэлийн гэрчилгээний хуулбар, иргэн бол иргэний үнэмлэхний хуулбар
• Уст цэгийн хайгуул хийлгэсэн байх шаардлагатай. Тухайн газарт чинь ус гарах боломжтой эсэх, хэдэн метрээс гарах, хэдэн төгрөг болох зэргийг хэлж, уст цэг тогтоосон дүгнэлт гаргаж өгдөг.
• Харьяа аймаг, нийслэлийн байгаль орчны газраас Гүний худгийн цооног өрөмдөх зөвшөөрөл авна.

Зөвшөөрөл авахад:

• Газрын гэрчилгээний хуулбар
• Кадастрын зургийн хуулбар
• Уст цэг тогтоосон дүгнэлт
• Улаанбаатар хотод хариуцсан байгаль хамгаалагчаас “Нүхэн жорлонгүй” гэсэн тодорхойлолт авна. (Нийслэлийн Засаг даргын 2018 оны А/834 дүгээр захирамжаар 2019.01.01-с эхлэн Нийслэлийн ногоон бүсэд стандартын бус нүхэн жорлон ашиглахыг хориглосон. Үүнтэй холбоотойгоор нүхэн жорлонтой бол хөрс усанд шингэдэггүй соруулдаг байдлаар хийсний дараа зөвшөөрлөл олгодог)
• Орон нутагт бол харьяа сум, багийн засаг даргын тодорхойлолт зэргийг бүрдүүлнэ.

Үйлчилгээний процесс:

• Иргэн, аж ахуйн нэгж байгууллагын хүсэлтийг e-business.mn, e-mongolia.mn хаягаар хүлээн авна. (Цаасаар хүлээн авахгүй)
• Мэргэжилтэн холбогдох бичиг баримтийн бүрдлийг үзээд уг хүсэлт гаргасан газар нь Байгаль орчныг хамгаалах тухай хууль, Усны тухай хууль, Усан хангамж ариутгах татуургын ашиглалтын тухай хууль, Ойн тухай хууль болон дагалдан гарсан дүрэм журам зөрчигдөж байгаа эсэх талаар судалж үзнэ.
• Шаардлагатай бол газар дээр очиж үзнэ. Хүсэлт гаргасан иргэнтэй утсаар холбогдож явах цаг өдрөө товлоно.
• Зөвшөөрөл гарах боломжтой бол төслийг боловсруулж хэлтсийн даргад танилцуулан зөвшөөрлийг гаргана.
• Иргэн НИТХ-аар батлагдсан журмын дагуу тэмдэгтийн хураамжийг төлж зөвшөөрөл авна.